Rheolaeth y safle

Mae cynllun rheoli’r safle yn mynd i’r afael â bygythiadau i Safle Morol Ewropeaidd Bae Caerfyrddin ac Aberoedd, sef ardal hanfodol i fywyd gwyllt, drwy arwain gweithredu ar y cyd i amddiffyn ei gynefinoedd a’i rywogaethau dynodedig.

Mae Safle Morol Ewropeaidd Bae Caerfyrddin ac Aberoedd yn cynnwys ystod amrywiol o rywogaethau a chynefinoedd sy’n arbennig, yn brin ac o dan fygythiad. Mae’r rhain yn rywogaethau a chynefinoedd y mae pob un ohonom yn elwa ohonynt mewn amrywiaeth o ffyrdd.

Mae llawer o weithgarwch dynol o fewn y safle ac felly mae angen i reolwyr edrych ar y rhyngweithiadau rhwng pobl, ein hinsawdd sy’n newid a’n hamgylchedd naturiol, er mwyn amddiffyn y rhain a rhoi’r cyfle gorau iddynt ffynnu.

Mae llawer o sefydliadau sydd â chyfrifoldeb cyfreithiol dros wneud hyn ac felly mae angen cydlynu eu gwaith i gael yr effaith orau.

Cynllun rheoli

Mae’r Awdurdodau Perthnasol wedi cydweithio i gynhyrchu Cynllun Rheoli ar gyfer yr SME. Nod y Cynllun Rheoli yw nodi’r hyn sydd angen ei wneud er mwyn diogelu nodweddion yr SME. Mae’r Cynllun Rheoli wedi’i ategu gan Amcanion Cadwraeth y safleoedd, a gynhyrchwyd gan Gyfoeth Naturiol Cymru (CNC).

Mae’r Cynllun Rheoli wedi’i gysylltu â Chronfa Ddata Gweithredoedd CNC, sy’n rhestru camau gweithredu ar gyfer pob Ardal Cadwraeth Arbennig yng Nghymru. Mae’r Cynllun Rheoli yn ategu’r gronfa ddata trwy ddarparu cyd-destun a rhesymeg ar gyfer y camau gweithredu a nodwyd. Mae hefyd yn cynnwys yr holl gamau gweithredu sydd eu hangen i gynnal rheolaeth safle, megis addysg, codi ymwybyddiaeth ac ymgysylltu.

Defnyddir camau gweithredu o’r Cynllun Rheoli a’r Gronfa Ddata Gweithredoedd i greu rhaglen waith ar gyfer y safle ac yna mae hyn yn pennu pa brosiectau sydd eu hangen.

Mae’r cynllun rheoli yn gweithredu fel fframwaith, gan ddarparu gwybodaeth am y mentrau sydd eisoes ar waith ar gyfer rheoli gwerth y safle o ran cadwraeth. Ei rôl yw sicrhau bod mesurau rheoli yn ddigonol i gyflawni’r nodau cadwraeth ac i amlygu bylchau lle gallai fod angen rheolaeth ychwanegol. Dim ond hwyluso’r gwaith rheoli a wneir gan y sefydliadau a’r mentrau presennol sy’n gweithredu o amgylch y safle, y mae’r cynllun rheoli. Y bwriad yw galluogi esblygiad yn rheolaeth y safle, er mwyn adlewyrchu’r amodau a’r mentrau cyfredol; mae hyn yn golygu y bydd angen diweddaru’r cynllun rheoli’n rheolaidd.